contoh dongeng sunda singkat

GAGAK HAYANG KAPUJI

Aya gagak maling dengdeng ti pamoean. Geleber hiber bari ngaheumheum dengdeng tea kana tangkal dadap sisi lembur. Kabeneran harita katangeneun ku anjing nu kacida kabitaeunana da puguh kabeukina. Kusabab kitu, ku anjing disampeurkeun. Tapi sanggaus anjing aya dihandapeun, boro-boro ditanya teu direret-reret acan.
Anjing mikir piakaleun supaya dendeng tea kapimilik ku manehna. Sanggeus manggih anjing ngomong, Leuh aya manuk alus-alus teuing. Pamatukna panjang bulu hideung tapi mani lemes kitu. Manuk naon nya ngaranna? Kawasna mah moal aya tandingna dibandingkeun jeung cendrawasih ge moal eleh.”
Mimitina mah omongan anjing teh teu didenge. Tapi sanggeus aya omongan moal eleh ku cendrawasih, gagak atoheun pisan. Manehna kungsi beja yen cendrawasih tehmanuk pang hadena. Tapi ceuk anjing manehna moal eleh".
Kitu nu matak manehna ngarasa ngeunah kupamuji anjing. Malah ceuk pikirna deui asa haying ngabagi dengdeng jeung anjing. Ngan kusabab hese meulahna kahayangna teu kalaksanakeun.
Anjing nempo beungeut gagak marahmay sanggeus dipuji ku manehna. Ceuk pikirna pasti usahana hasil. Ceuk pikirna deui naon hesena muji-muji keur ngahontal kahayangna.Kusabab kitu pok deui anjing,”Lamun daekeun mah haying nyobat jeung manuk nu sakitu lucuna. Ngan rumasa sorangan mah sato hina.
Saumur-umur kudu ngadunungan, sare digolodog, rajeun manggih hakaneun oge pasesaan. Tapi najan teu bisa nyobat oge jeung manuk lucu, atuh ngadenge-ngadenge sorana. Meureun moal panasaran teuing!”.
Barang ngadenge pamuji anjing anu sakitu ngeunahna, gagak poho keur ngaheumheum dengdeng, ngan ngong we disada, “Gaak Gaaak” cenah. Atuh barang engab pamatukna barang pluk we dengdeng tehmurag. Anjing gancang nyantok dengdeng nu murag tea tuluy dihakan di nu bala.
Gagak nu hanjakaleun mah teu ditolih. Sababaraha jongjonan gagak teh cindekul we dina dahan bari ngararasakeun teu ngeunahna ku kalakuan anjing. Manehna karek ngarti yen anjing muji bebeakan tehhaying dengdeng nu keur diheumheum ku manehna.
Ti dinya mah geleber gagak tehhiber kana tangkal kai rek neangan hileud keur ganti dengdeng nu disantok ku anjing.

WAWALES KA NU TELENGES

Hiji mangsa sakadang puyuh kacida sediheunnana, sabab anakna sadua-dua anu karek gumuling teu aya dina sayangna. Padahal can lila diparaban.
Sabot indung jeung bapak puyuh ka luar tina sayang rek neangan hakaneun keur anakna, ari balik anakna geus teu aya. Nu aya teh ngan ukur getih ucrat-acret. Puyuh curiga ka beurit, sabab cenah geus lila manehna tunghal-tenghol kawas nu keur ngintip.
Malah puyuh meunang beja ti cangehgar nu tara bohong, cenah enya nangenan beurit ka luar tina sayang puyuh bari sungutna pinuh ku getih. Cangehgar teu bisa nulungan da si beurit kaburu kabur.
Bakat ku ngenes harita keneh puyuh jalu jeung bikang indit ka sayang alap-alap. Barang geus panggih derekdek puyuh jalu nyaritakeun kasedih hatena.
Alap-alap nyanggupan mangnaurkeun kasedih puyuh, cenah si beurit rek dijejewet. Ti harita alap-alap sok nyumput dina tangkal teureup, panonna mah teu weleh gular giler ka handap nempoan sugan beurit tea ka luar tina sayangna. Kungsi sakali mah alap-alap nyamber si monyong.
Ngan nu disamber rikat nyumput kana sayangna handapan tunggul. Ti harita nu diincer ku alap-alap tehteu ka luar deui.
Ari beurit sanggeus rumasa boga dosa ngahakan anak puyuh, bari dirina ngarasa diancam ku alap-alap, dina hiji peuting kabur. Ngan di perjalanan nyorang wahangan. Manehna teu biasaeun meuntas.
Keur huleng jentul di sisi wahangan naha atuh ari gajlok tehbangkong hejo ka hareupeun nana. Puguh we beurit tehkacida reuwaseunana, disangkana alap-alap ngudag, Ceuk beurit, “Alah sampean mah ngareureuwas!” .
“Naha make reuwas sakadang beurit, kawas boga dosa!” ceuk bangkong. “Rek kamana ieu tehwayah kieu geus aya di dieu?” ceuk bangkong deui.
Ngadenge omongan bangkong kitu teh beurit balaham-belehem asa kasindiran. Tungtungna mah beurit waleh hayang dipangmeuntaskeun, sabab cenah aya perlu ka beulah ditu. Bangkong nyanggupan ngan cenah kudu isuk dimana geus caang, sabab harita mah poek keneh.
Isukna bangkong nalian suku beurit beulah hareup. Tungtung tali nu sabeulahna deui ditalikeun kana sukuna beulah tukang. Geus kitu gajlok bangkong ka wahangan atuh beurit kagugusur.
Ti dinya mah soloyong we bangkong ngojay ka tengah wahangan. Puguh we bangkong beurateun biasana ngojay sorangan ari harita kudu meuntaskeun beurit.
Barang nepi ka tengah-tengah wahangan, bangkong tehhayangngaheureuykeun beurit. Ti dinya bangkong teh teuleum ka dasar wahangan. Atuh beurit ka bawa. Beurit gogorowokan embung di bawa teuteuleuman da cenah eungap. Tapi ku bangkong teu didenge, lep teuleun deui.
Ku sabab sababaraha kali di bawa teuleum, tungtungna mah beurit nepi ka hanteuna, paeh. Geus kitu mah bangkong seuri bari ambang-ambangan.
Keur kitu teu kanyahoan ti tadina, kalayang alap-alap nu ngincer beurit ti kamari, seot nyamber beurit nu geus jadi bangke, ber dibawa hiber ka awang-awang.
Atuh bangkong ge ka bawa, roroesan paureun, da tara biasa ngapung. Mokaha we poe harita alap-alap meunang kauntungan. Sanggeus meakeun beurit nu sakitu lintuhna, bibilasna ku bangkong hejo.

Kuda Hade Budi

Aya Maung eukeur mah geus kolot katambah gering, ngalungsar handapeun tangkal kai bari gegerungan. Sato-sato nu kungsi menang kanyeri ti manehna ngarumpul ngariung nu keur gegerungan tea.
Ceuk Munding, “Ah siah make gegerungan! Rek nyambat ka saha? Moal aya nu nyaaheun ka sia mah! Sato jahat!” Munding ngomongna kitu bari ngagadil nu keur gegerungan.
Nempo kalakuan Munding kitu, sakabeh sato nu harita aya di dinya sareuri akey-akeyan.
Kabeh sato nu aya di dinya ngaheureuykeun Maung nu keur sakarat, kajaba sakadang Kuda. Nempo sato-sato sejen galumbira teh manehna mah ukur gogodeg.
Ceuk Domba, “Kunaon sakadang Kuda kalah gogodeg kitu? Lain tejeh tah si Belang teh ku sampean! Lain baheula si Belo ditekuk?” Tembal Kuda, “Kaula mah lain teu ngewa kana kalakuan Maung teh.
Ngan waktu ieu kaayaanana pan keur gering parna. Manehna teh keur sakarat, sakeudeung deui oge paeh. Kuduna mah sato nur keur sakarat teh ulah dihareureuykeun kitu.
Meureun ceuk batur teh, rajeun aya kawani ka anu keur sakarat!” Sanggeus ngadenge omongan Kuda kitu, sakur sato nu aya di dinya jempe sarta patinglaleos ka leuweung deui.

Sakadang Kuya jeung Sakadang Monyet Ngala Nangka 

Kacaritaheun sakadang monyet jeung sakadang kuya keur sarare disisi hutan deukeut walungan, dina tangkal kiara. Sakadang kuya mah sare dihandap disela-sela akar, ari sakadang monyet mah sare dina dahan anu panghandapna, teu pajauh.
Maksud teh ngameh bisa bari ngobrol memeh sare, atawa bisa silih geuingkeun bisi aya nanaon. Dug weh duanana sare mani tibra. Teungah peuting sakadang monyet nyaring, terus ngahudangkeun sakadang kuya.
"Sakadang kuya, sakadang kuya.." ceuk sakadang monyet "naon sakadang kuya" tembal sakadang monyet "kuring ngimpi manggih tangkal nangka anu buahna geus arasak, dina mimpi teh katingali deuih tempatna dimana" ceuk sakadang monyet "dimana ?" ceuk sakadang kuya.
"Diteungah leuweung" ceuk monyet "keun atuh isuk wang teang, ayeunamah sare deui we da peuting keneh." tembal kuya ari geus kitu teh dug weh sakadang monyet mah langsung sare, meni dug sek. ari sakadang kuya mah hulang huleng keneh dan hese sare deui.
Keur hulang huleng kitu, sakadang kuya ngadenge sakadang monyet ngalindur, pokna teh "Ah isukan mah kuurang rek dihakan eta nangka teh kusorangan, keun we da sakadang kuya mah teu bisaeun naek tangkal ieuh,, hahaha".
Ngadenge kitu, sakadang kuya ngahuleung, kapikiran caritaan sakadang monyet keur ngalindur. kapikiran, sok sieun bener. sanggeus rada lila mikiran, akhirna manehna meunang akal. trus dug weh sare.
Isuk-isuk sakadang monyet geus hudang tuluy ngageuingkeun sakadang kuya. "Kuya, kuya, geura hudang buru, wang teang nangka tea" ceuk sakadang monyet "Kela atuh tunduh keneh.." tembal sakadang kuya "Eeh buru, kaburu kubatur" ceuk sakadang monyet bari ngoyag ngoyag awakna ngameh hudang.
"Nya hayu atuh ari kitu mah" ceuk sakadang kuya bari lulungu keneh Arindit weh maranehna teh katempat tangkal nangka nu aya dina mimpi sakadang monyet. Ari pek teh bener, tangkal nangka eta teh aya.
Ceuk kuya, "Sok atuh monyet gera naek, da urang mah teu bisa naek tangkal.." "Kela, urang teu bisa ngabedakeun mana nangka nu asak jeung mana nangka nu atah keneh kuya" ceuk monyet memeh naek Bari seuri dina hate.
Sakadang kuya ngajawab, "Lamun sorana plek plek plek berarti nangka eta geus asak, lamun sorana pluk pluk pluk berarti nangka eta atah keneh.."
"Oh heug atuh" ceuk sakadang monyet bari langsung nerekel naek. bari gagalantungan neangan nangka, dina jero hate na manehna ngomong, "kuurang mah rek dibere nu atah we sakadang kuya mah, keun we lamun protes naha mere nu atah, rek dititah naek tangkal we. hahaha"
Terus weh ngalaan nangka si monyet teh, anu sorana plek plek plek mah diteundeun diluhur keur didahar kusorangan, ari nu sorana pluk pluk pluk mah dialung-alungkeun kahandap.
Padahal mah nu asak mah lain nu sorana plek plek plek, tapi nu sorana pluk pluk pluk anu dialung-alungkeun ka si kuya.
Nya puguh we pas sakadang kuya ngadahar nangka teh lainna amis, malah narapel si geutahna kana awak jeung kana biwir. "Uya, naha nanga urang mah atah euningan ? ceuk sakadang monyet bari balelol ngomongna da biwirna pinuh ku geutah.
"Apan maneh anu ngalung-ngalungkeun kahandap mah, urang mah ngan saukur narima hungkul." bari keur ngadahar nangka teh, tereh beak.
"Ah manehmah tega ka babaturan teh, maenya urang dibere anu atah" bari cireumbay da teu ngadahar nangka asak.
Akhirna mah sakadang kuya balik bari wareug, ari sadakang monyet mah indit duka kamana da baeud tea.

Sireum jeung Japati

Aya sireum rek nginum disisi walungan. Keur ngarayap kahandap, manehna tisoledat. Pluk ragrag kana cai. Hadena caina rada ngeuyeumbeu pelebah dinya mah. Tapi keukeuh bae ari ngojay kasisi mah manehna teu bisaeun. Sireum gegeroan, ” tulung, tulung, ieu kuring rek tikerelep, tulungan..!”
Kabeneran aya japati keur cindeten dina dahan kai anu nyodor kaluhureun cai. Kadengeun aya sireum gegeroan menta tulung. Barang ngareret kahandap, katenjoeun sireum keur kokosehan. Japati karunyaeun, geleber hibeur bari ngegel daun salambar.
Song diasongkeun daun teh kahareupeun sireum. Sireum tuluy muntang kana daun. Daun kujapati dibawa ka darat. Sok digolerkeun kana taneuh. Sireum pohara nganuhunkeunana ka japati anu geus ngaleupaskeun manehanana dina bahaya.
Dina hiji mangsa japati teh cindeten deui dina dahan kai anu nyodor ka walungan tea. Sireum anu baheula ditulungan ku manehna oge kabeneran aya dihandapeun tangkal. Harita tikajauhan aya paninggaran nyampeurkeun leumpangna keketeyepan
Teu talangke deui buru-buru sireum nyampeurkeun japati bari ngaharewos ka manehna. ”heh japati, buru-buru geura hibeur, tuh aya paninggaran keur ngintip.” Panigaran geus ngawengkang bedilna. Tapi japati kaburu geleber hibeur.
Isukna japati papanggih deui jeung sireum. Ceuk japati: ”Nuhun pisan sakadang sireum, kuring geus ditulungan ku anjeun, leupas tina balai.” Jawab sireum: ”ari eta mah kapanan kawajiban sarerea, nulungan batur anu rek meunang cilaka, eta wajib. Komo ieu mah kuring ayeuna hirup keneh teh lantaran geus ditulungan ku sampean.”
Tah kitu cenah lalakon sireum jeung japati anu akur jeung silih tulungan. Abdi gaduh sisindiran yeuh.... kieu geura ...!!


" Itu lain langlayangan
Manuk heulang puputeran
Hirup teh henteu sorangan
Kudu daek silih tulung. "

Sakadang Maung jeung Sakadang Bagong

Kacaritakeun di hiji leuweung ganggong simagongong, aya bagong keur anakan. Eta bagong teh keur huleng jentul wae bangun ngemu kabingung. Pangna kitu lantaran poe eta manehna kudu nedunan jangji ka Sakadang Maung, nyaeta masrahkeun anakna.
Hiji waktu manehna kungsi dikerekeb ku Sakadang Maung. Harita Sakadang Bagong ceurik. “Sing karunya bae ka kuring, Sakadang Maung! Kuring teh geus kolot, dagingna oge tangtu nya liat nya kelang.
Kieu bae, engke lamun anak kuring geus lahir, ku kuring rek dibikeun ka andika. Tangtu dagingna empuk tur pelem.” Ngadenge caritaan Sakadang Bagong kitu, Sakadang maung teh teu tulus ngerekeb. Hiji waktu manehna rek datang deui, nagih jangji.
Nya harita, waktu Sakadang Bagong geus anakan, manehna kudu nyumponan jangjina. Tapi piraku aing rek tega mikeun anak ka Sakadang Maung? Kumaha akalna sangkan anak aing teu tulus dihakan? Sakadang Bagong terus uleng mikir, neangan piakaleun.
Keur kitu aya Sakadang Peucang nyampeurkeun. “Ku naon andika bet kawas nu keur bingung kacida, Sakadang Bagong?” Sakadang Peucang nanya. Gorolang Sakadang Bagong nyaritakeun ku naon pangna manehna baluweng poek pipikiran.
Sakadang Peucang ngahuleng sakedapan. Teu lila pok nyarita: “Euh gampang atuh ari kitu mah. Andika ulah hariwang, keun kumaha kuring bae. Urang neangan akal sangkan anak Ki Silah salamet tina panandasa Sakadang Maung. Dagoan heula di dieu, kuring rek neangan Sakadang Landak!”
Sakadang Peucang ngaleos. Teu lila oge geus ngurunyung deui dibarengan ku Sakadang Landak. Manehna terus ngajak indit ka hiji guha.
Tepi ka guha nu dituju, sakadang Peucang metakeun akalna. Sakadang Landak kudu asup ka jero guha, ngaringkuk di nu rada poek.
Buluna anu kawas cucuk teh kudu dipuridingkeun. Sakadang Bagong kudu cicing di lawang guha, ngabageakeun Sakadang Maung lamun engke ngurunyung. Ari manehna kadua anak Sakadang Bagong rek nyarumput di nu buni.
Teu lila Sakadang Maung geus rentang-rentang datang. Ti kajauhan oge geus ngagerem, nyingsieunan Sakadang Bagong. “Mana anak sampean teh, Sakadang Bagong?” cek Sakadang Maung bari jungang-jengong.
Sakadang Bagong antare nembalan: “Tuh, di jero guha. Tah geuning katenjo ti dieu oge, ngaringkuk di juru. Pek ayeuna kuring masrahkeun, nedunan jangji ka andika. Didaharna ulah dilila-lila, teureuy bae sakaligus, sing ulah kadenge ceurikna.
Jig geura sampeurkeun, kuring rek indit heula, teu kaduga nenjona.” Sakadang Maung nenjo rarat-reret ka jero guha. Enya bae katenjoeun aya nu ngaringkuk di juru. Awahing ku atoh bari teu kuat hayang geura ngerekeb, gabrug bae nu ngaringkuk teh dirontok, disamualkeun.
Puguh bae cucuk landak teh rungseb manggang sungutna. Sakadang Maung gegerungan, sungutna baloboran getih. Diutah-utah oge landak teh teu daekeun kaluar, da cucukna naranceb pageuh pisan. Antukna Sakadang Maung teh paeh. Sakadang Landak ngurumuy kaluar tina sungutna.
Sakadang Bagong kacida bungaheunana. Anakna salamet. Manehna nganuhunkeun pisan ka Sakadang Peucang anu geus mere pitulung ka dirina. Kitu deui ku Sakadang Landak oge manehna kahutangan budi. Sakadang Peucang jeung Sakadang Landak tuluy arindit deui ninggalkeun Sakadang Bagong.

Entog Emas

Kacaritakeun aya saurang patani nu kacida malaratna cicing di hiji saung gubuk nu geus reyot. Mang Julin patani ngaranna teh. Hirup sapopoena ngan dibaturan ku sakadang entog, hiji-hijina. Mang Julin kacida nyaaheunana ka eta sakadang entog teh, bubuhan manehna mah teu boga dulur-baraya, malih garwa mah.
Hiji poe manehna indit ka sawah, isuk-isuk pisan manehna geus indit, kabeneran dititah ku juragan Lurah pikeun ngabinihan sawahna. Ari digawena mah kapake pisan ku Juragan Lurah teh, kusabab Mang Julin segut pisan kana gawe nanaon oge. Ari entogna dikencarkeun di buruan gubuk teh, tara aya hariwangan.
Balik ti sawah wanci sariak layung, Mang Julin kacida laparna. Manehna ngadeuheus ka Pangeran, “Duh, Gusti... mun paparin abdi beunghar, meureun dahar nanaon oge bisa.. “ . Mang Julin teu dahar ngan karo uyah. Sanggeus wareg mah manehna tuluy ngampihan entog di juru imah.
Isuk-isuk keneh Mang Julin kahudangkeun ku kingkilaban nu ayana ti juru imah. Panasaran, manehna tuluy cahya gugurilapan teh disampeurkeun. Manehna teu nyangka yen cahya nu kacida serabna teh tina kandang entog, singhoreng teh entogna endongan, endogna endog emas.
Mang Julin peupeureudeuyan, nyagap endog teh. Manehna kacida bungahna, eta endog emas, emas murni. “Bisa dijual ieu mah, ...“ gerentesna.
Poe kadua, kitu deui, entogna ngaluarkeun endog emas deui hiji. Kitu saban poe, sakadang entog teh endogan endog emas hiji. Nya puguh Mang Julin teh jadi beunghar. Manehna geus boga sawah sorangan, imah gedong, balong, ternak entog, jeung harta lianna nu mucekil. Entog teh nyaan mawa rejeki keur Mang Julin.  
Hiji poe, Mang Julin ngarasa cape mun kudu unggal poe ngadatangan kandang entog pikeun mawa endog emas pira hiji teh. Mang Julin sasadiaan bedog keur ngabeleh entog ngarah emasna kabeh kaluar, jadi manehna teu kudu mawaan unggal poe ka kandang entog.
Ari geus dibeleh entog teh, teu kaciri emas-emasna acan. Malahan entog teh paeh. Mang Julin teu bisa ngabebenah hartana. Manehna jadi miskin deui sabab unggal poe hartana beak dipake kabutuhan sapopoena.

Dongeng bahasa sunda, gajah eleh ku sireum

Hiji waktu di tegalan di Afrika, aya hiji gajah keur ngadigleu we leumpang ngageyot di tegalan. Padahal di tegalan nu rek diliwatan ku gajah teh aya sireum lobana mangjuta-juta, keur digawe nyieun sayang. Kapan di tegalan Afrika mah sireum teh nyarieun sayangna marucunghul patingrunggunuk. Tampolana ku gedena sayang sireum teh aya nu segede pasir leutik patingarenclo.

Di jero eta sayang sireum nu lobana jutaan teh ngarendog, baranahan. Jeung lain siga sireum di urang. Sireum Afrika mah bentukna rek siga sireum tataman lamun di urang. Galak sabab mun geus ngaronom mangsana, bakal amburadul. Singa, zebra oge teu mangga pulia mun geus dironom ku eta sireum mah.

Ari minangka alat komunikasina antarsireum teh nya eta “anteneu” opat jiga tanduk. Lamun hiji sireum Afrika manggihan kadaharan, “anteneuna” tea tingarulang mere kode jeung soara. Jauhna eta alat teh bisa rebuan meter. Nya kusabab kitu, mun hiji sireum meunang kahakanan, dina waktu sababaraha menit jutaan sireum bisa nambrong hiji sato gede, umpamana singa nu geus rerempo atawa zebra, bisa diserang ukur jamjaman kari tulang-talengna wungkul. Ngagehan ajag.

Basa gajah ngaliwat ka eta tegalan teh, aya nu nangenan nya eta manuk dadali. Manehna karunyaeun bisi sayang sireum nu keur babareungan dijieun teh digele ku gajah. Nya gajah teh dibejaan.

“Gajah, kade leumpang teh ulah noyod ka lebah dinya, sabab sireum keur nyarieun sayang bisi katincak karunya,” ceuk manuk dadali ngingetan.

“Wah na asana teh pira sireum. Katincakan mah paling ge pejet!” gajah nembalanana teh sombong pisan, asa aing gede, asa aing kuat. Ka nu leutik teh teu ngahargaan pisan.

Kitu deu kadal Afrika ge nu haat ngabejaan ka gajah sangkan ulah noyod bisi nincak sayang sireum, teu diwaro anggur terus we gajah teh ngadigleu muru jutaan sireum nu keur parulang anting ngakutan taneuh ti jero lombang.

Na barang anjok kana gundukan imah sireum tea, ngan leye .. leye we sireum nu aya rewuna teh ditincakan, atuh ngan hos paraeh we da teu kaburu kabur.

Ningali rayatna rebuan paraeh ditincakan ku gajah, raja sireum ambekun pisan. Gajah ditangtang perang. Gajah ditantang kitu teh lain sadar kana kasalahanana, kalah ka atoh bari sombong. Manehna seuseurian. Ari sireum nyieun siasat keur perang jeung gajah teh rewuan sireum teh nyieun lombang nu jeronan salaput gajah.

Dina waktu nu geus ditangtukeun perang dimimitian. Loba sato sejen nu ngalalajoan perang campuhna antara pasukan sireum jeung gajah teh.

Gajah nyuruntul rek ngaleyek rewuan sireum nu nangtang perang ka gajah. Sireum ngahajakeun nangtang ti jajalaneun nu geus meunang ngagali tea. Atuh ditangtang kitu asa dilelewean, gajah teh beuki ambek.

Sebrut nyuruntul ka hareup teu tolih tincakeun. Atuh puguh we barang nepi kana lombang tea, ngan gurawil we gajah teh asup kana lombang bari tigurawil kana lombang. Gajah ukur bisa ugal-ugil teu bisaeun hanjat.

Sireum geus puguh nempo lawanna tigebrus teh teu ngengkekeun deui terus we napuk nyarocoan. Teu dibere ampun beuki lila sireum teh beuki loba, antukna gajah bobor karahayuan teu kuat ngalawan sireum nu ceuk ukuran mah sakitu leutikna, lain tandingna.

Si Kancil Dan Buaya

Dina hiji poe aya si kancil, sato nu dianggap pinteur eta teh keur lelempangan disisi leuweung. Manehna keur neangan walungan kusab cuaca poe ayena teh panas kacidaan, si kancil neangan cai keur nginum kusabab ngarasa aus.
Teu lila kaparengan disisi leweung teh manehna nempo aya walungan anu caina rada kiruh. Sikancil nyampeurkeun sarta nginum caina eta, sanggeus si kancil nginum aya anu nyuara dina jero beuteung na.
"kruuuk…kruuuuuk…kruuuuuk."
Wah, rupana si kancil ayena tos mulai kalaparan. Si kancil ngabayangkeun nikmatna lamun aya kadaharan kabekina nyaeta bonteng. Nanging kebon bonteng eta aya di peuntas walungan. "Kumaha cara menyeberangna nya kuring teh?" Ceuk si kancil bari mikiran carana sakedeung.
Teu kungsi lila si kancil boga ide, bari ajol-ajolan si kancil kegirangan terus bari ngajorowok: “Hey.. Buaya….buaya…. hayu buru keluaaaaar….. Kuring boga kadaharan jang maraneh!!” Ceuk si kancil ka buaya-buaya anu kabeneran loba cicing di walungan eta teh.
Sakali deui si kancil ngageroan: “Buaya…buaya… buru keluar… hoyong daging seger henteeeuu?” Teu lami saterusna, aya hiji buaya kaluar ti dina jero cai, “Bruaaar… saha anu gogorowok gandeng beurang-beurang kieu.. ngaganggu kuring sare bae.”
Buaaaarr.. Pamingpin buaya datang “Heh kancil.. cicing maneh.. lamun henteu cicing, ku urang da'ang maneh.” Ceuk buaya kadua anu kaluar barengan.
“Wah…. Alus maraneh kaluar euy, mana deui buaya anu laina?” Tembal si kancil saterusna. “Lamun maneh ngan dua'an, sesa kadaangana bakal moal beak, jadi buru geura kaluar kabeh." Ceuk si kancil bari jojorowok deui.
“Aya naon kancil sabenerna ieu, hayu geura omongkeun, ”ceuk si buaya teh.  "Kieu yeh buaya, hapunten lamun kuring ngaganggu sare maneh, soalna kuring rek babagi daging seger pikeun maraneh nu aya di walungan ieu, ku kituna buru geura kaluarkeun sakabeh baturan maneh jang ngabeakeun kabeh daging-daging seger ieu."
Ngadenge arek dibagikeun daging seger, teu kungsi lila, eta buaya geura-giru ngageroan babaturana supaya kaluar kabeh. “Hey, babaturan kabeh, aya daging gratis yeuh! Hayu urang keluaaaar….!” Ceuk pamingpin buaya mikeun komando nu tegas kanu buaya sejen.
Teu sabaraha lami, tos mulai kalaluar eta buaya-buaya tina jero cai teh.  “Nah, ayeuna kuring kedah ngitung tiheula aya sabaraha buaya-buaya anu hadir teh, hayu maraneh para buaya geura ngajajar hela teupi kasisi walungan palih ditu tuh, engke kuring itung hiji-hiji.” Ceuk si kancil bari rada serius ngomongna.
Teu mikir panjang, si buaya-buaya eta geura-giru nyokot posisi masing-masing, buaya-buaya mulai ngajajar tepi kasisi walungan seberang, nyieun sapertos jembatan.
“Oke, ayeuna kuring langsung mulai ngitung nya? ” ceuk si kancil, bari mulai ngajolan ka tonggong buaya, “Hijiii….. duaaaa….. tiluuu…..” Sabari terus ngajolan tonggong buaya anu hiji ka buaya lainna. Dugi ahirna si kancil nepi di peuntas walungan. Bari ngomong dina jero hatena: “gampang geuningan euy.”
Dugi di peuntas walungan, si kancil ngomong ka buaya-buaya: “Hey buaya-buaya, sabenerna teh teu aya daging seger anu rek kuring bagikeun, kan ges katempo kuring teh teu mawa nanaon.” Kuring mah ngan saukur hayang meuntas walungan hungkul weh da kuring ge lapar euy." Ceuk si kancil teh bari seura-seuri.
Sakabeh buaya anu aya didinya atuh meren kesel kabeh kusabab ngarasa ditipu si kancil. “Haaaaaaaaahh… awas maneh kancil mun kapanggih deui.. Beak maneh..!!" Teu mikir panjang, si kanci geura lumpat ngiles asup kajero tatangkalan nuju kebon pa tani kaur ngala bonteng nu jadi kabeukina

"Fabel sakadang peucang"

Jaman baheula di hiji leuweung, wanci tengah poe ereng-erengan, sakur sasatoan keur ngariuhan. Kacaritakeun peucang, manehna pohara ngarasa halabhabna.

Kolonyong peucang ka walungan nu pareunahna teu anggang ti dinya. “Ah, rek ngalekik nginum saseubeuhna ”, kitu ceuk pikirna.

Karek ge dua-tilu leguk, gep teh sukuna aya nu ngegel. Peucang reuwas lain meumeueusan, tapi teu bisa ngejat lantaran sukuna pageuh kacakep.

Boro-boro ngejat, ngajerete ge hese! Peucang jaba reuwas jaba nyeri, jaba kaduhung deui dirina teu ati-ati. Bakat ku halabhab atuda, sologoto kana cai we, buhaya mah nu keur nangoh ngadodoho, teu katenjo.

Tapi dasar peucang mah pinter. Sakolepat ge geus manggih akal sangkan dirina salamet. Sanajan sukuna karasa nyeri digegel ku buhaya nu huntuna sakitu ranggetengna, tapi peucang api-api teu ngarasa we.

Luk deui tungkul neruskeun nginum. “Aeh aeh.. geuning aya maneh, buhaya! Keur moyan nyah? Hampura nya kuring teu sopan, ngaliwat teu pupuntenan. Boa-boa bieu teh katincak irung? Hampura nya, teu kuat ku halabhab kuring teh!” ceunah.

Ngadenge omongan peucang, buhaya ngarasa heran. Naha peucang mani tenang, kawas nu teu ngarasaeun sukuna digegel? “Tong ngadahar dahan kai atuh, buhaya! Moal ge ngeunah!” ceuk peucang.

“Maaaaana dahan kai? Pan ieu mah suku maneh, cang!” ceuk buhaya , ngomongna rada ngosom, da bari barang gegel.

“Emh...watir! mun kuring boga hakaneun mah, meureu dibikeun ka maneh. Tapi naon atuh da kuring mah teu boga nanaon. Boga awak ge apan ieu sakieu leutikna. Jeung barina ge boga uruseun anak pamajikan.

Mangkaning pamajikan kuring kamari anyar ngajuru deui, teuing opat teuing lima saborojolan teh” ceuk peucang.

“Cik atuh sing karunya ka kuring, cang! Piraku kuring kudu paeh kalaparan. Cik atuh menta suku maneh hiji mah, lumayan we jang ngaganjeul beuteng....” buhaya ngomong mani lengas-lengis sangkan dipikarunya.

“Heug atuh ari maksa-maksa teuing mah, watir we kuring mah.. ngan pek atuh lepehkeun heula etah dahan kai nu keur diheungheum teh!

Terus sungut maneh calawakkeun sing tarik, ngarah buntung sakaligus, da nyeri ari disegetan saeutik-saeutik mah!” ceuk peucang.

“Sok ayeuna mah geura calawak sing rubak....!” peucang marentah bari panonna gular-gilir neangan dahan atawa awi nu sakira meujeuhna pikeun metakeun akalna.

Ari buhaya barang karasa kana sungutna aya nu asup, capluk weh nyapluk sataker tanaga! Da samarukna nu asup teh suku peucang sakumaha ceuk perjangjian tea.

Atuh puguh we...ari capluk, ari ceb....si haur teh nyeundak kana lalangit sungutna luhur handap, terus nyeceb hese dipukahkeunnana da kapaseuk ku regang nu rungseb dina saban bukuna!

Sungut buhaya jadi samutut, rungkang ku regang haur! Kalah ku haben digubag-gabig, laun-laun mah haur teh nungtut narecat tina sungut buhaya.

Tungtungna golomong weh lesot sapisan. Arisot ari seot.. buhaya ngudag ka sisi cai. Tapi peucang geus mangpret ka tonggoh, lain udag-udageun tukang di cai.

Buhaya ngawakwak nyarekan jeung ngati-ngati. Peucang kalah seuseurian. HaHaHaaaaaa...!!

"Kelinci Dan Domba Adu"

Jaman baheula, di hiji leuweung aya kelinci keur nyatuan bangun anu ponyo naker. Keur kitu, torojol domba adu datang.
Nempo aya kelinci keur nyatuan, pok domba adu teh nyarita. “Kelinci, maneh mah ari nyatu rampus, ari awak leutik bae. Asa cumah dahar unggal poe ge ukur meakkeun jukut bae, ceunah”.
“Naha kudu kumaha ari awak kuring? Apan iyeuh lintuh!” tembal kelinci. “Dasar goreng milik bangsa maneh mah, dikadarkeun boga awak teh ukur sagede kitu! Yeuh tempo kuring, awak jangkung badag, tanduk ranggaek!
Bangsa careuh, ajag, oray, moal waraneun ngaganggu ka kuring mah! Coba ka maneh, boro-boro maung, anak ucing wanieun nekuk!” ceuk domba adu mani adigung pisan.
“Ah, na ngahina teuing, Domba! Na teu sieun katulah maneh teh, da goreng-goreng oge kuring teh tunggal didamelan Gusti. Sanajan bukti oge, teu meunang nganyenyeri kitu, da awak kuring leutik teh, lain kahayang sorangan, geus guratna we.
Tong adigung, Domba! Saha nu nyaho hiji waktu mah maneh teh bakal butuh ku pitulung kuring!”  tembal kelinci bari nyabar-nyabar maneh.
“Ahh pitulung naon! Deuk ge maneh nu butuh ku pitulung kuring. Mun aya ajag atawa careuh rek ngerekeb maneh, tangtu moal waranieun mun maneh babarengan jeung kuring mah, da sieuneun di teunggar!” domba adu kalah beuki sombong ngomongna teh.
Keur kitu... gaur, gaur! Sora maung ti kajauhan! Tereleng weh kelinci mah lumpat, sup sup kana liangna nu teu jauh ti dinya. Orokaya domba adu bingungeun kudu ka mana nya lumpat, sabab maung geus deukeut teuing. Mun lumpat pasti kaberik.
Rek milu nyumput kana liang kelinci, moal asup da awakna gede teuing, jaba raridu ku tanduk. Kelinci noong tina langna, ngawaskeun paripolah domba. Mimitina mah hatena mupuas nempo domba nu tadi sakitu ngahinana, ayeuna nyanghareupan marabahaya teh.
Tapi dasar kelinci mah bageur, hade hate, nempo domba sakitu bingungeunana teh, jadi ngarasa watir. Tereleng manehna kaluar deui tina liangna sarta pok ngomong ka domba adu “Domba nyumput kana gowok, gigireun liang kuring!” ceunah.
“Ah, katewak meureun ku maung, da maung ge asup kana gowok sagede kitu mah!” ceuk domba adu. Beungeutna mani geus pias bakating ku pohara sieunna.
“Moal! Ke ku kuring dilimpudan ku taneuh, ngarah teu kacirieun ku maung! Sok-sok buru-buru, bisi maung torojol manten!” ceuk kelinci.
Sangges domba merenah nyangkerok dina gowok, gancang kelinci kokoreh kana taneuh ngebul hareupeunana. Sewur...sewur taneuh ngebul teh nutupan gowok. Kelinci naker tanaga, mani pakupis ngorehan taneuh sabab sieun maung kaburu datang.
Sangges beres, kelinci tibuburanjat asup deui kana liangna sabab maung geus deukeut pisan. Kelinci jeung domba adu cricing, jarempe ngadedempes di tempatna masing-masing.
Maung kalantang-kulinting keneh, neangan susuganan aya domba, atawa peucang, atawa naon we nu bisa dihakan. Tapi geus sidik euweuh mah, leos we ngaleos bari garam-gerem jeung guar-gaur. Gendok meureun pedah teu beubeunangan nanon.
Sangges sidik maung geus jauh, kurumuy domba adu kaluar tina panyumputanana, mani kuyumut. Terus gigibrig jeung gogodeg, nurunkeun kekebul nu narapel sakujur buluna.
“Duh nuhun teuing, Kelinci! Kuring kacida tumarimana kana kahadean maneh. Kumaha petana kuring mulang tarimana?” ceuk domba adu bari kalamas-kelemes semu era.
“Lah, teu kudu mulang tarima sagala, da kawajiban, papada mahluk kudu silih tulungan....” tembal kelinci bari soleh naker, “....ngan pamenta kuring mah, maneh tong sok resep ngahina ka batur teh.
Ulah kena-kena awak badag sarta gagah, kanu leutik teh mani embung ngahargaan pisan!” ceuk kelinci leuleuy.
“Heueuh, hampura we, rumasa kuring teh salah, gede dosa. Pek cirikeun ti ayeuna ka hareup mah kuring rek ngomean adat, moal daek huna-hina, malah deuk nyaah kanu leutik teh,” ceuk domba adu terus jeung hate.
Teu jalir tina jangjina domba adu teh. Enya ti harita mah adat sombongna teh leungit. Ka nu leutik nyaah. Sosobatannana jeung kelinci beuki raket bae.

"Sakadang Sapi"

Jaman baheula di leuweung sakadang sapi keur ngahuleng, siga nu boga kasusah. Di pkir saliwat mah asa teu pantes, awak badag, tanaga rosa, tanduk seukeut, tapi naha beut nguyung siganu aral subaha.
Tah, ayeuna ge, sakadang sapi hulang-huleng bae teh keur mikir, kumaha carana sangkan hakaneun teu kasoro ku batur. Pangpangna dina usum katiga, jukut jeung dangdaunan teh mani gararing.
Sangges ngahuleng lila naker, serengeh sakadang sapi seuri. Manehna manggih akal nu hade kumaha carana sangkan jukut jeung dangdaunan di eta leuweung jadi boga manehna kabeh.
“Kuring kudu jadi sobat maung sangkan batur sarieuneun”. Kitu ceuk sapi sajeroning hatena. Geus mikir kitu mah, gidig weh sakadang sapi teh ngagidig rek nepungan maung.
Poe harita keneh, sakadang maung mapay-mapay nu rea jukutan. Kabeh sato di ancam, yen singsaha nu wani nyatuan di eta leuweung, pinasti baris pinanggih balai. Atuh puguh we, kabeh sato ge sieun ku ancaman sakadang maung mah.
Kabeh nyaringkah sarta nareangan hakaneun ngalasruk ka jero leuweung nu moal kasaba ku maung. Tangtu we jadi sarakah. Tapi dalah di kumaha tibatan jadi korban mah.
Seuri we sakadang sapi mah nenjo batur sangsara teh. Dirina senang malang-mulintang baranghakan euweuh nu ngarewong. Unggal poe manehna mawa batur saurang, aya embe, aya kuda, aya munding, aya domba, atawa naon we kumaha pamenta maung.
Carana teh di bibita, diolo, dibawa ka tempat nu rea jukut. Puguh we atoheun dibawa ka tempat parab teh, da hese apan neangan jukut saeutik ge ayeuna mah.
Teu nyahoen keur diparabkeun, gabrug weh dirontok ku maung, terus digusur dibawa ka dungusna. Mimitina mah euweuh nu nyahoeun kana akal jahat sapi teh.
Sarerea teu nyarangka, yen sapi tega marab-marabkeun batur sorangan pikeun kapentingan dirina pribadi. Tapi laun-laun mah kanyahoan, yen geuning sapi teh sakitu jahat, telenges, jeung hawekna.
Atuh puguh we sarerea ngarewaeun pisan ka sapi teh. Malah rea diantarana nu ngancam rek males. Mindeng sato nu sejen, pangpangna sato nu laleutik patingrariung badami neangan akal ngahukuman ka sakadang sapi.
Tapi susah da sakadang sapi salawasna di tangtayungan ku sakadang maung nu mangrupa raja eta leuweung. Saha atuh nu wani ngalawan raja ? tibatan beunang di arah mah, sakadang sapi kalah beuki sakawenang-wenang, boga rasa euweuh nu wani ngaganggu.
Sapi ngarasa kawasa. Padahal sarerea ge gimir teh lain ku sapina, tapi ku maungna. Tapi da Gusti mah Maha Adil. Teu burung datang wawales kanu telenges teh.
Hiji poe datang rombongan paninggaran ka eta leuweung. Patingkedepruk sapatuna, patingharaok corowokna, patingjaledor bedilna. Sasatoan paburisat lumpat nyalametkeun dirina.
Tapi aya sawatara nu beunang, di antarana sakadang maung. Teu walakaya geuning sang raja teh nyanghareupan takdir Gusti mah. Sakadang maung katembak meneran jajantungna pisan. Atuh jungkel, kerejet-kerejet, hos weh paeh!
Sangges nu maroro marulang, sasatoan tingrariung aya embe, kuda, gajah, jarapah, domba, munding, banteng, jeung nu lainna. “sakadang maung geus paeh, sakadang sapi ayeuna mah moal aya nu mangmeunangkeun, hayu ayeuna mah urang hukuman ku sarerea!” ceuk sakadang domba.
Manehna manehna kacida ambekna ka sakadang sapi, lantaran anak-incuan beak diparabkeun ka sakadang maung. Lantaran sakanyeri, sakapeurih, bring atuh sarerea ngajorag ka imah sapi.
Sapi teu walakaya, nepi ka paehna pada ngaraponan. Malah ku sakadang munding mah, imahna ge diruksak diburak-barik. Awahing ku ijid!

"Raja Monyet"

Jaman baheula di hiji leuweung aya tangkal buah. Gede jeung jangkung pisan. Daunna mayung kawas tangkal caringin. Teuing buah naon da euweuh nu nyahoeun kana ngaranna, tur tangkal buah kitu teh dimamana ge tara aya.
Di eta leuweung ge ngan aya eta we satangkal-tangkalna. Eta tangkal buah teh dicicingan ku raja monyet katut ra’yatna. Ku raja monyet, sakabet ra’yatna diomat-omatan sangkan ngajaga ulah aya buah nu murag ngacemplung ka walungan.
Nu geus asak kudu buru-buru diala, bisi murag manten. Ari sababna mun aya nu murag ka walungan, tangtu palid, mun kapangging ku jelema, terus ku eta jelema teh di dahar, tangtu bakal deudeuieun.
Tuluy, eta jelema tangtu bakal neangan dimana tangkalna. Mun kapanggih pasti kabeh monyet diusir, dibuburak, malah bisa jadi sarerea dipaehan. Sarerea pada apal, yen jelema mah sarakah, harawek alah batan monyet.
Tapi tariking cilaka, hiji mangsa mah aya buah nu murag teu kanyahoan. Kecemplung ka cai walungan, terus ngalengleong palid ka hilir. Beuki lila beuki jauh. Tungtungna nepi ka hiji karajaan.
Ari pek teh kapanggih ku anak raja nu keur ulin di sisi walungan. Nenjo aya buah aneh ngangkleung , ku anak raja teh dicokoy. Ku sabab pikabitaeun am weh didahar. “Buah naon ieu teh , mana ngeunah-ngeunah teuing....?” ceuk anak raja.
Anak raja luak-lieuk nengan tangkal buah nu kitu. Susuganan deukeut ti dinya. Tapi lapur da apan tangkal eta mah ngan aya hiji-hijina saalam dunya.
Lantaran kapanggihna ge keur ngankleung diwalungan atuh ku sarerea kaharti, pasti tangkalna teh jadina di sisi cai. Nya atuh narenganna ge mapay-mapay we ka girang. Ngasryk bari teu reureuh sarurak euyah-euyahan.
Monyet nu keur genah-genah arulin, kacida reureuwaseunnana barang ngadenge sora euyah-euyahan ti kajauhan teh. “kumpuuuul....! kumpppuuull...!. Cilaka....! pasti aya buah murag teu kanyahioan ! Aayeuna, tah sora jelema kadarieu ! pasti rek ngalaan buah urang.
Baritangtu urang dipaehan !”. atuh buriak sarerea bubar. Terus brut-bret ngajambretan areuy. Terus ditumbu-tumbukeun nepi ka jadi tambang. Sangges beres, terus tungtung tanbang tina areuy teh dicangreudkeun kana dahan.
Ari nu tungtung nuhijina deui di bawa ngojay ku raja monyet ka peuntas ditu. Sangges nepi ka peuntas, gancang raja monyet nerekel mamawa tungtung tambang rek dicangreudkeun kana dahan tangkal nu aya di dinya.
Orokaya tambang teh kurang panjang! Kurang seutik deui pisan! Raja monyet ngahuleng, mangkaning sora prajurit geus beuki deukeut. Ahirna tungtung tambang teh di talikeun we kana suku duanana, geus kitu puranteng leungeuna muntang kana dahan.
“Sookk... geura mareuntas! Ngantai saurang-saurang! Tong paboro-boro bisi ragrag ka walungan! Nu marawa orok kade sina muntang sing parageuh!” Raja monyet gogorowokan marentah ti peuntas.
“Kajeun awak kuring ancur, asal salamet we sakabeh ra’yat kuring...” kitu pamikir raja monyet teh. Hiji-hiji ra’yat monyet teh salamet nepi ka peuntas, terus naraek kana tangkal.
Beuki lila beuki rea nu salamet. Tapi sabalikna, beuki lila beuki rea tulang tonggong rajana nu parotong. Ahirna salamet we kabeh!
Ra’yat monyet hareraneun naha rajana teu buru-buru lumpat? Srog sawatara monyet nyalampeurkeun. Sangges srog kakara sidik, sihoreng raja monyet teh geus teu walakaya, ukur empes-empesan.
Beuki lila beuki leuleuseun, sirahna beuki ngulahek, panonna peureum, ketug jajantungna beki ngendoran, tungtungna mah les weh raja monyet teh paeh.
Tonggongna ancur lantaran teu kuateun ditarincakan ku ratus-ratus urang ra’yatna. Segruk weh monyet nu nyalampeurkeun teh careurik nyengceurikan rajana nu geus ngorbankeun nyawana sorangan demi kasalametan ra’yatna.